इंजोरिया में चांद (मगही कविता) -धर्मेन्द्र कुमार पाठक

इंजोरिया में चांद इतरा रहल हे.

चंदनिया घूघवा सरका रहल हे.

चित चकोर के चंदा चुरा रहल हे,

बगिया में चंदनिया नहा रहल हे.

धरती अपन रूप के सजा रहल हे,

ओकर घूघवा बदरा उठा रहल हे.

मन में घुंघरू कोई बजा रहल हे,

सुरवा गीतिया के सजा रहल हे.

चंदनिया मन ही मन सकुचा रहल हे,

चांद तक-तक के मुख मुसका रहृल हे.

बदरिया चंदवा के छिपा रहल हे,

चंदनिया के मन ललचा रहल हे.